Qarkullimi në Tunelin e Llogarasë do të jetë pa tarifë deri në përfundim të sezonit turistik, konkretisht deri më 15 shtator, sipas burimeve nga "Vizion Plus". Pas kësaj date, përdoruesit do të duhet të paguajnë një tarifë prej 10 eurosh për vajtje-ardhje me automjet në këtë vepër infrastrukturore.
Tuneli, i gjatë 5.9 kilometra, ka reduktuar ndjeshëm kohën e udhëtimit nga Dukati drejt Palasës, nga 45 minuta që kërkonte më parë kalimi në Qafën e Llogarasë, në vetëm 7 minuta.
Projekti përfshin dy tunele, ku njëri prej tyre është ndërtuar për raste emergjencash, por parashikimet janë që, në rast rritjeje të fluksit të turistëve, të dy tunelet të shfrytëzohen për qarkullim normal.
Menaxhimi i pagesave do të realizohet nga Enti Kombëtar i Operimit Rrugor, një shoqëri aksionere me kapital shtetëror, që përfaqësohet nga Ministria e Infrastrukturës dhe Energjisë. Ky ent do të kujdeset për funksionimin e portave automatike, mirëmbajtjen, sistemin e tarifimit, shpërndarjen e biletave dhe abonimeve mujore për përdoruesit e rregullt.
Me nisjen e pagesës në Tunelin e Llogarasë, bëhen gjithsej tre segmentet rrugore me pagesë në vend: Milot–Morinë, Thumanë–Kashar dhe Dukat–Palasë.
