Tregtarët e tregut maqedonas në Korçë protestuan sërish para Bashkisë së qytetit, duke kundërshtuar vendimin për vendosjen e tendave të reja uniforme, të cilat sipas tyre kanë një kosto të papërballueshme për bizneset e vogla.
Kjo është protesta e dytë brenda pak javësh, ndërsa tregtarët ankohen për urdhra të vazhdueshëm dhe kërkesa kontradiktore nga Bashkia dhe Policia Bashkiake. Sipas tyre, rregullat ndryshojnë vazhdimisht dhe mungon transparenca mbi vendimet që po merren për tregun.
Tregtarët denoncojnë edhe afatin e vendosur nga Bashkia deri më 19 maj për instalimin e tendave të reja, të cilin e konsiderojnë të papranueshëm. Ata thonë se kostoja e tendave arrin deri në 700 mijë lekë dhe duhet të përballohet nga vetë bizneset.
Sipas protestuesve, Bashkia duhet të marrë përsipër investimin për tendat e reja, pasi shumë prej tyre po përballen me vështirësi të mëdha ekonomike. Ata paralajmërojnë se presioni ndaj biznesit të vogël po shtohet dhe se një pjesë e dyqaneve rrezikojnë mbylljen.
