Konflikti mes adoleshentëve në Durrës, ku një prej tyre mbeti i plagosur rëndë, vërteton sërish dështimin e politikave të qeverisë dhe ministrisë së Brendshme për sigurinë e shkollave.
Tetë nxënës të gjimnazit “Dom Nikollë Kaçorri” në zonën e Kënetës u përfshinë në një përplasje që nisi në rrjetet sociale, u zhvendos brenda ambienteve të shkollës dhe përfundoi në një konflikt fizik jashtë saj. 15-vjeçari u godit katër herë me thikë, një prej të cilave prek organe jetësore, duke i rrezikuar seriozisht jetën.
Në shtator të këtij viti, kryeministri Edi Rama dhe ministrja e Brendshme Albana Koçiu prezantuan një plan masash për sigurinë në shkolla, duke deklaruar se “në shkollat publike janë vendosur oficerë sigurie të cilët do të garantojnë mbrojtjen e nxënësve nga çdo fenomen negativ, përfshirë dhunën dhe rreziqet online”. Sipas tij, oficerët do të asistoheshin nga Policia e Shtetit dhe ajo Bashkiake për të monitoruar dhe parandaluar incidente brenda dhe përreth shkollave.
Megjithatë, realiteti duket se është ndryshe. Ngjarja e djeshme tregon se masat e prezantuara shërbejnë më shumë si propagandë sesa si mbrojtje reale për nxënësit. Ndërsa shkollat nga institucione që duhet të jenë shembulli i dijes dhe i sigurisë, janë kthyer në arena dhune mes të rinjve.
Ky nuk është rasti i vetëm. Në tetor, një ngjarje e ngjashme ndodhi në gjimnazin “Ibrahim Rugova” në Kamëz, ku dy të mitur u plagosën me thika gjatë një konflikti mes bashkëmoshatarësh, njëri prej të cilëve me plagë të thella në kraharor.
Rastet e dhunës mes të rinjve në shkolla pasojnë njëra-tjetrën që nga tragjedia e një viti më parë, kur 14-vjeçari Martin Cani u vra pas një përplasjeje të ngjashme jashtë shkollës. Pavarësisht reagimeve të opinionit publik, qeveria ka mbetur vetëm tek premtimet me kamera dhe policë në shkolla që nuk kanë arritur të parandalojnë këto incidente.
