Shqiptarët duhet të presin që çmimi i karburanteve të arrijë në 220 lekë për litër që qeveria të ndërhyjë për të frenuar rritjen e mëtejshme.
Në fjalën e tij në Asamblenë e PS, kryeministri Edi Rama deklaroi se qeveria do të ndërhyjë në akcizën e naftës vetëm nëse çmimi kalon këtë nivel.
“Kemi marrë vendim që për çdo ditë kur çmimi do të kërcejë mbi tavanin e 220 lekëve, do të ketë menjëherë një ulje me 20% të akcizës së naftës”, tha Rama.
Kjo do të thotë se një nga masat e vonuara që qeveria paraqet si ndërhyrje do të hyjë në fuqi vetëm pasi çmimi të arrijë në një nivel shumë të lartë për qytetarët. Deri atëherë, shqiptarët do të vazhdojnë të paguajnë karburantin me çmimet e reja, të cilat tashmë janë rritur me 10–15 lekë për litër.
Ekspertët e tregut të energjisë shprehen se ulja e akcizës nuk ka një ndikim real në çmimin final për konsumatorin, ndërsa paralajmërojnë edhe për rrezikun e mungesës së furnizimit në treg.
Një tjetër masë e përmendur nga kryeministri është rikthimi i Bordit të Karburanteve, të cilin ai e paraqet si një mekanizëm për stabilizimin e çmimeve. Por përvoja e mëparshme e funksionimit të këtij bordi ka treguar se shqiptarët kanë vazhduar të paguajnë karburantet me çmime të larta, pa një ulje reale në treg.
