Një autobus me studentë shqiptarë nuk është lejuar të kalojë kufirin në pikën doganore të Bllatës në Dibër, në kufi me Maqedoninë e Veriut. Autoritetet maqedonase nuk kanë dhënë ende një arsye zyrtare për vendimin.
Ngjarja ndodh në një kohë kur studentët shqiptarë në Maqedoninë e Veriut po përgatiten për protestën e radhës, me kërkesë kryesore të drejtën për zhvillimin e provimeve në gjuhën shqipe.
Sipas organizatorëve, studentët janë koordinuar në qytete si Kumanovë, Tetovë, Strugë dhe Shkup, ndërsa kërkesa e tyre buron nga studentët e drejtësisë që prej dy vitesh kërkojnë të japin provimet në gjuhën amtare, pa gjetur zgjidhje.
Ata theksojnë se kjo e drejtë garantohet nga Kushtetuta dhe Marrëveshja e Ohrit, por sipas tyre nuk është zbatuar plotësisht. Protesta e parë u mbajt më 6 prill në Shkup, përballë Ministrisë së Drejtësisë, ndërsa studentët vijojnë të kërkojnë reagim institucional.
Aksioni i tyre po shihet gjithashtu si një çështje më e gjerë politike mbi përfaqësimin e shqiptarëve në Maqedoninë e Veriut, në një periudhë kur pjesë e qeverisjes janë edhe përfaqësues shqiptarë nga koalicioni VLEN.
