Gazetari Andrea Danglli ka reaguar lidhur me rastin e një pensionisti që po detyrohet të kthejë 11 mijë lekë të përfituara nga kompensimi i energjisë, duke e cilësuar si një padrejtësi dhe poshtërim ndaj të moshuarve.
Postimi
Një pensionisti po i kërkohet me urgjencë të kthejë në buxhetin e shtetit 11 mijë lekë “të përfituara padrejtësisht” nga kompensimi i energjisë, për shkak të një gabimi të vetë administratës.
Dokumenti i firmosur, vulosur e menderosur që qarkullon nëpër rrjet, e ve me shpatulla pas muri këtë "armik të financave publike", duke i kërkuar që deri në korrik të kthejë çdo thërrime.
Personalisht propozoj që drejtori i cili ka firmosur, ose duhet të transferohet në SPAK si talent për gjurmimin e “krimit ekonomik” ku mund të konfiskojë para aspiratorësh, ose në morgun shtetëror, sepse veç aty mund të administrohet me kaq ftohtësi halli i një burri të moshuar.
Në këtë vend mund të humbasin miliona euro, mund të falen borxhe përmes mekanizmave që gjenden, mund të zhduken tendera, mund të bëhen pasanikë njerëz që dje nuk kishin as frena biçiklete, por kur vjen puna tek pensionisti, shteti bëhet tigër për ta kapur e rrjepur.
Pa ju dridhur qerpiku, e var në çengelin e ligjit, i kujton afatet, i llogarit kamatëvonesat dhe i bën me dije "hanxharin" që e pret.
Ka shumë marrëzi që ky popull i ka falur, po i fal dhe do t'i falë, por nuk e di nëse ka turp më të neveritshëm se poshtërimi i pleqërisë.
