Situatë dramatike me përmbytjet në vend. Durrësi dhe rrethinat vijojnë të jenë nën pushtetin e ujit. Banorët kërkojnë ndërhyrjen e institucioneve, pasi sipas tyre situata mbetet problematike, sidomos në zonat periferike. Nga raportimet paraprake, rreth 10 familje nga njësitë administrative Rrashbull dhe Manzë janë prekur, pasi prurjet e mëdha të ujit kanë përmbytur banesat e tyre. Këto familje janë akomoduar për momentin pranë Konvaleshencës.
Përmbytjet kanë prekur edhe burgun e Durrësit. Për shkak se qelitë e katit të parë janë bërë të pabanueshme, të paraburgosurit janë zhvendosur në katin e dytë.
Në Fushë-Krujë, lumi Ishëm ka dalë nga shtrati duke përmbytur dhjetëra hektarë tokë bujqësore. Në Shkodër, 15 banesa janë nën ujë dhe situata mbetet shqetësuese. Si pasojë e reshjeve të dendura të shiut, përroi i Glinës në Vaun e Dejës ka dalë nga shtrati.
Për më shumë se dy orë, rruga Laç–Milot u bllokua për shkak të mosfunksionimit të kanaleve kulluese. Si pasojë, qarkullimi i automjeteve u paralizua, duke krijuar radhë të gjata.
Reshjet kanë shkaktuar probleme edhe në Rrugën e Arbrit. Në segmentin e Xibrit, nga tuneli i Murrizit deri te tuneli numër dy në fshatin Shkallë, janë shënuar rrëshqitje dherash.
