Ministria e Mbrojtjes bëri bilancin e situatës së zjarreve në vend për periudhën nga ora 09:00 e 17 gushtit deri në orën 09:15 të 18 gushtit 2025. Sipas njoftimit zyrtar, në Shqipëri janë evidentuar 23 vatra zjarri, prej të cilave 16 janë shuar plotësisht, 4 mbeten aktive dhe 3 janë nën monitorim.
Vatrat e shuar ndodhen në Gramsh, Vlorë, Skrapar, Përmet, Durrës, Krujë, Memaliaj, Shkodër, Patos, Delvinë dhe Elbasan. Ndërkohë, situata mbetet kritike në disa zona:
Bulqizë: dy vatra aktive në Tërnovë (Liqeni i Zi dhe Valikardhë) dhe një në fshatin Val, ku ndërhyjnë forcat zjarrfikëse, pyjore dhe bashkiake.
Fushë Arrëz: disa vatra jashtë kontrollit në fshatrat Xeth, Kolumri dhe Trun; terreni i vështirë ka mobilizuar 50 efektivë të Forcave të Armatosura me mjete zjarrfikëse.
Kolonjë, Parku Natyror i Gërmenjit: vatër aktive që po përhapet drejt kufirit, ndërhyrje nga zjarrfikësit, strukturat vendore dhe 30 ushtarë të repartit të Drenovës.
Vatra të tjera në Vaqarr, Pezë Helmës, Ibë dhe Delvinë mbeten nën mbikëqyrje të autoriteteve.
Agjencia Kombëtare e Mbrojtjes Civile, në bashkëpunim me Forcat e Armatosura, shërbimet zjarrfikëse, strukturat vendore dhe banorët e zonave të prekura, vijon punën për neutralizimin e plotë të vatrave dhe mbrojtjen e komuniteteve.
