Rreth 55% e familjeve shqiptare pohojnë se përballojnë shpenzimet mujore “me shumë vështirësi” ose “me vështirësi”, duke treguar një nivel të lartë pasigurie ekonomike. Kjo përqindje është shumë më e lartë se mesatarja e Bashkimit Europian, ku vetëm 17% e qytetarëve ndihen të varfër. Në rajonin e Ballkanit, situata është disi më e lehtë, 34% e serbëve, rreth gjysma e malazezëve dhe pothuaj gjysma e maqedonasve perceptojnë veten si të varfër.
Të dhënat janë publikuar nga Eurostat, i cili mat edhe varfërinë subjektive, pra perceptimin e qytetarëve për gjendjen e tyre ekonomike, përveç treguesve tradicionalë si rreziku për të qenë i varfër, mungesa materiale dhe sociale e theksuar, apo jetesa në familje me anëtarë të papunë. Sipas këtij treguesi, shqiptarët renditen të dytët në Europë pas grekëve, ku 67% e popullsisë ndihen të varfër.
Megjithëse të dhënat perceptuese janë alarmante, ekziston një hendek i madh mes varfërisë së ndjerë dhe asaj të matur nga institucionet zyrtare. Në Shqipëri, varfëria monetare sipas matjeve zyrtare për vitin 2024 është rreth 20%, ndërsa më shumë se gjysma e popullsisë mendon se jeton në kushte varfërie, duke krijuar një diferencë prej mbi 30 pikë përqindje. INSTAT raportoi se gjatë vitit 2024 treguesi i rrezikut për të qenë i varfër ishte 19%, me një prag të ardhurash prej vetëm 330 lekësh në ditë për person, ose rreth 9,700 lekë në muaj, duke reflektuar realitetin e vështirë ekonomik që shumë familje shqiptare përjetojnë çdo ditë.
