Prej kohësh rritja e popullsisë shihej si tregues i zhvillimit dhe mirëqenies, por sot një pjesë e botës po përballet me një realitet të ri: tkurrjen demografike.
Sipas të dhënave të Bankës Botërore, aktualisht 42 vende dhe territore po përjetojnë rënie të popullsisë, me disa prej tyre në ritme shumë më të larta. Pjesa më e madhe e këtyre vendeve ndodhen në Evropën Lindore, ku Kosova, Moldavia dhe Maqedonia e Veriut shënojnë ndër rëniet më të theksuara. Shkaku kryesor mbetet emigracioni masiv drejt vendeve më të zhvilluara.
Shqipëria renditet në vendin e nëntë mes 10 vendeve me tkurrjen më të madhe të popullsisë në botë për vitin 2024. Banka Botërore e bazon këtë vlerësim mbi normat vjetore të rritjes demografike për çdo vend.
Ekspertët theksojnë se vendet e Evropës Lindore kanë njohur një nivel të lartë emigracioni gjatë dekadave të fundit, për shkak të diferencave të theksuara në paga me Evropën Perëndimore, si dhe lehtësive të lëvizjes që ka sjellë procesi i integrimit europian.
