Shqipëria feston sot 113-vjetorin e Pavarësisë, një nga datat më të rëndësishme të historisë shqiptare. Në të gjitha trevat, shqiptarët nderojnë këtë ditë që shënoi lindjen e shtetit të pavarur, më 28 nëntor 1912, kur Ismail Qemali ngriti flamurin kuqezi në Vlorë.
Shpallja e Pavarësisë u bë në Kuvendin e Vlorës, ku morën pjesë 83 delegatë nga të gjitha trevat shqiptare, ndërsa 40 prej tyre nënshkruan Aktin e Pavarësisë. Asambleja formoi menjëherë qeverinë e parë shqiptare të kryesuar nga Ismail Qemali, si dhe Këshillin e të Urtëve, të njohur si Pleqësia, duke i dhënë kombit të drejtën e tij të pamohueshme për liri dhe vetëvendosje.
Ceremonitë qendrore sot zhvillohen në Vlorë, ku në orën 10:00 do të nis ngritja zyrtare e flamurit, e shoqëruar me nderime pranë varrit të Ismail Qemalit, parada festive, ekspozita, panaire, shfaqje folklorike, koncerte rinore e simfonike, dhe në mbrëmje Koncerti i Madh Festiv.
Atmosfera festive dhe pjesëmarrja e gjerë e qytetarëve në mbarë vendin e bëjnë këtë 28 Nëntor një ditë krenarie kombëtare. Flamuri kuqezi valëvitet sot më lart se kurrë, në nder të atyre që vunë themelet e shtetit shqiptar.
