Disa shkolla në Shqipëri vijojnë të përballen me kushte të papërshtatshme infrastrukturore, ku problematikat kryesore mbeten lagështira në ambientet e brendshme e të jashtme, amortizimi i godinave, mungesa e ngrohjes dhe e ujit, si dhe pajisjet e vjetra shkollore. Këto gjetje janë publikuar në raportin vjetor të Inspektoriatit Shtetëror Shëndetësor për vitin 2024.
Sipas raportit, gjatë vitit janë kryer gjithsej 4,033 inspektime dhe ri-inspektime në institucione arsimore publike dhe jopublike, që nga kopshtet dhe shkollat, deri te universitetet, konviktet dhe mensat. Qëllimi i inspektimeve ka qenë verifikimi i zbatimit të ligjeve dhe akteve nënligjore për të garantuar kushte optimale të mësimit, jetesës dhe shlodhjes për nxënësit dhe studentët.
Problemet e evidentuara tregojnë se në një pjesë të institucioneve arsimore mungojnë tualetet e përshtatshme për grupmoshat, si dhe infrastruktura bazë për zhvillimin normal të procesit mësimor, duke ngritur shqetësime mbi sigurinë dhe mirëqenien e fëmijëve.
