Segmenti i parë i autostradës Tiranë-Durrës deri te mbikalimi i Rinasit po hyn në një traditë të re infrastrukturore: çdo muaj një afat i ri. Fillimisht u tha se punimet do të mbylleshin në dhjetor. Më pas kalendari u korrigjua për janarin. Tani qeveria ka vendosur një datë të tretë: javën e parë të majit.
Pra, përveç asfaltit dhe betonit, projekti duket se ka prodhuar edhe një seri afatesh që zgjaten me një fleksibilitet të admirueshëm.
Gjatë një inspektimi në terren këtë të enjte, ministri i Infrastrukturës dhe Energjisë, Enea Karakaçi, siguroi se punimet janë në fazën përfundimtare dhe se segmenti do të hapet brenda javës së parë të majit.
“Brenda javës së parë të muajit maj ky lot i këtij segmenti do të hapet plotësisht. Ky aks ka rëndësinë e tij për lidhjen e portit të Durrësit me Morinën dhe për lidhjen mes Veriut me hyrjen në Tiranë por edhe sa i takon turizmit. Duhet të theksojmë që në këtë segment po punojmë me disa projekte të tjera si Bypassi i Tiranës dhe segmenti Kashar-Lekaj”, tha Karakaçi.
Segmenti konsiderohet i rëndësishëm për trafikun hyrës dhe dalës nga Tirana, për lidhjen me portin e Durrësit dhe për qarkullimin drejt veriut të vendit. Për qytetarët, megjithatë, rëndësia kryesore nuk është më data e radhës që shpallet, por momenti kur një nga këto data do të vendosë më në fund të përputhet me realitetin.
