Rritja e çmimit të naftës ka ndikuar direkt në rritjen e çmimeve të biletave të transportit publik në të katër qytetet e Qarkut Dibër. Sipas operatorëve, linjat ndërqytetase janë ato që kanë pësojë rritje më të madhe.
Për shembull, një biletë Peshkopi – Tiranë, që më parë kushtonte 500 lekë, tashmë ka shkuar në 600 lekë. Nga Bulqiza drejt Tiranës çmimi është rritur nga 300 lekë në 400 lekë për pasagjer, ndërsa për linjën Burrel – Tiranë bileta ka shkuar nga 400 lekë në 500 lekë.
Qytetarët shprehen se kjo rritje ndikon direkt në buxhetin e tyre familjar, duke u bërë më e vështirë për pensionistët dhe për ata që marrin ndihmë ekonomike. “Është rritur bileta 1 mijë lekë. S’kemi si paguajmë. Jemi vetëm burrë e grua me pensionin. Vetëm me marrë mushkën tani!”, shprehet një banor.
Edhe transporti nga fshatrat drejt qendrave të qyteteve ka pësuar rritje çmimi, megjithatë në një masë më të ulët krahasuar me linjat ndërqytetase. Qytetarët kërkojnë ndërhyrje nga shteti dhe kompensim për rritjen e shërbimeve dhe produkteve.
