Në ditën e dytë të vitit 2026, reshjet e dëborës janë rikthyer në zonat malore të veriut dhe juglindjes së vendit. Në veri, dëborë është regjistruar në akset Dedaj–Razëm, Bogë–Theth dhe Vermosh, si dhe në qytetin e Shkodrës, ku më pas reshjet janë shndërruar në shi.
Autoritetet e qarkullimit rrugor bëjnë me dije se trafiku zhvillohet normalisht, por drejtuesit e automjeteve këshillohen të përdorin goma dimërore dhe të kenë me vete zinxhire për raste ngricash.
Në juglindje, dëborë ka rënë në pikën kufitare Qafë Thanë, zonën e Mokrës dhe rrugën Qukës–Qafë Pllocë. Temperaturat kanë shënuar deri në -7°C. Policia e qarkullimit apelon për kujdes të shtuar, ulje të shpejtësisë dhe pajisjen me goma dimërore, duke rekomanduar gjithashtu që të minimizohen lëvizjet drejt zonave malore me akull.
Bora e parë e vitit ka zbardhur edhe Librazhdin, duke krijuar pamje dimërore dhe duke ulur ndjeshëm temperaturat. Reshjet kanë mbuluar rrugët, çatitë dhe zonat përreth me një shtresë të bardhë bore.
