Hysenbelliu, drejtues i “Focus Group” që përfshin News24, Panorama TV, Gazetën Panorama, Panorama Sport, Panorama Online dhe Gazetën Shqiptare Online, dënoi ashpër ndërhyrjen e policisë dhe ushtrisë në ambientet e televizionit dhe mediave të tij.
Sipas tij, pa asnjë paralajmërim, urdhër gjykate apo bazë ligjore, forca të shumta të sigurisë bllokuan hyrjen, ndërprenë me forcë sinjalin e transmetimit dhe ndërhyrën në punën e gazetarëve dhe stafit teknik.
Hysenbelliu e cilëson këtë veprim si një shkelje flagrante të lirisë së shtypit dhe të së drejtës së qytetarëve për t’u informuar.
Ai paralajmëroi se civilë të paidentifikuar hynë në ambientet e medias dhe morën dokumente konfidenciale dhe materiale të ndjeshme, që lidhen me hetime serioze për korrupsion dhe abuzim me pushtetin. Këto materiale janë rezultat i punës së palodhur dhe të rrezikshme të gazetarëve të tyre, dhe tani përveç dëmit moral, rrezikohet edhe jeta e tyre.
Në mesazhin drejtuar stafit të News24 dhe grupit Panorama, Hysenbelliu i ftoi të qëndrojnë të fortë dhe krenarë për misionin e tyre, duke theksuar: “News24 nuk mbyllet. E vërteta nuk zhduket.”
