Banorët e fshatit Kurdari, në Bashkinë e Klosit, kanë dalë në protestë kundër ndërtimit të një hidrocentrali në përroin e Luses, duke larguar nga zona mjetet e firmës që kishte nisur punimet.
Sipas banorëve, i gjithë fshati është kundër projektit, pasi pretendojnë se ndërtimi i HEC-it rrezikon burimin e ujit dhe jetesën e tyre. Ata thonë se prej rreth 8 muajsh protestojnë për të kundërshtuar këtë projekt.
“Po na marrin burimin e ujit dhe po na detyrojnë të largohemi nga fshati”, shprehen banorët e Kurdarisë.
Nga ana tjetër, përfaqësues të firmës deklarojnë se kanë ndjekur të gjitha procedurat ligjore dhe se disponojnë dokumentacion të plotë për ndërtimin e hidrocentralit. Ndërkohë, në vendngjarje kanë mbërritur edhe forcat e policisë, të cilat po monitorojnë situatën për të shmangur përshkallëzimin e protestës.
