Sot, nga ora 17:00, sheshi “Skënderbej” në Tiranë pritet të mbushet me mijëra qytetarë nga të gjitha trevat shqiptare, në një protestë të madhe për drejtësi ndaj ish-udhëheqësve të Ushtrisë Çlirimtare të Kosovës, të cilët vijojnë të mbahen në paraburgim në Hagë.
Tubimi, i organizuar nën moton “Liria ka emër, drejtësi për çlirimtarët”, konsiderohet një nga protestat më të mëdha të organizuara deri më sot në mbështetje të krerëve të UÇK-së. Në të pritet të marrin pjesë qytetarë, përfaqësues të shoqërisë civile dhe figura të njohura politike nga mbarë trojet shqiptare.
Organizatorët bëjnë me dije se nga Kosova janë nisur rreth 60 autobusë me protestues që do t’i bashkohen tubimit në Tiranë. Edhe Këshilli Koordinues i Asociacioneve Familjare të të Zhdukurve në Kosovë (KKAFZhK) ka konfirmuar pjesëmarrjen, duke e cilësuar këtë protestë si detyrim moral ndaj atyre që udhëhoqën luftën për liri.
Në një deklaratë për media, shoqatat dhe familjarët e personave të zhdukur shprehën mbështetje të plotë për organizimin, duke e konsideruar procesin gjyqësor në Hagë si të padrejtë dhe të shkëputur nga parimet e drejtësisë tranzicionale në Kosovë.
Në shenjë solidarizimi, Autoritetet shqiptare kanë vendosur që “Rruga e Kombit” të jetë pa pagesë gjatë gjithë ditës së sotme, për të lehtësuar qarkullimin e qytetarëve drejt protestës.
Protesta të ngjashme janë mbajtur edhe në Prishtinë dhe Hagë, ndërsa organizatorët theksojnë se kjo lëvizje synon të dërgojë një mesazh të qartë uniteti dhe mbështetjeje për çlirimtarët e luftës së Kosovës.
