Organizata “Qëndresa Qytetare” zhvilloi një protestë përpara Komisariatit të Policisë Rrugore në zonën e Kinostudios, kundër aksionit të Policisë për sekuestrimin e monopatinave elektrike.
Protestuesit kundërshtojnë masat e marra nga autoritetet, duke argumentuar se sekuestrimi i dhjetëra monopatinave është bërë në mungesë të një akti zyrtar dhe në shkelje të të drejtës së pronës private.
Sipas organizatës, qytetarëve u janë marrë mjetet vetëm mbi bazën e një njoftimi të publikuar në rrjetet sociale nga Ministria e Brendshme, pa asnjë dokument ligjor të protokolluar.
“Me qindra monopatina u janë sekuestruar qytetarëve të Tiranës mbi bazën e një urdhri në rrjetet sociale për të cilin nuk ka asnjë shkresë zyrtare. Sekuestrimi është bërë në shkelje të hapur të ligjit, duke i ekspozuar qytetarët përballë kostove financiare të padrejta dhe duke cenuar pronën private,” – deklaron Qëndresa Qytetare.
Ky reagim vjen pas njoftimit të 12 tetorit nga Ministria e Brendshme dhe Policia e Shtetit për ndalimin e përkohshëm të përdorimit të monopatinave elektrike, me arsyetimin e rrezikshmërisë së tyre në trafik. Vendimi ka shkaktuar pakënaqësi të gjerë mes përdoruesve të këtyre mjeteve, të cilët e konsiderojnë masën disproporcionale dhe të paargumentuar ligjërisht.
