Komisioni Evropian ka publikuar progres-raportin për Shqipërinë për vitin 2025, duke vënë në dukje shqetësime serioze për sektorin e sigurisë ushqimore.
Raporti thekson se Shqipëria nuk ka bërë mjaftueshëm progres në kapitullin 12, Siguria Ushqimore, i cili mbetet një nga kapitujt më të vështirë për t’u përshtatur sipas standardeve të BE-së. Mungesa kryesore është regjistri i kafshëve dhe monitorimi i sëmundjeve që rrezikojnë shëndetin e gjësë së gjallë dhe të njeriut.
“Verifikimi dhe regjistrimi i numrit të kafshëve në nivel kombëtar vazhdoi, ka ende punë të mëdha për të përmirësuar regjistrin e kafshëve me informacion shtesë për kafshët e tjera, siç është parashikuar në akuzën e BE-së”, thuhet në raport.
Raporti thekson se Shqipëria ka vazhduar zbatimin e programeve për monitorimin e brucelozës dhe tuberkulozës në grumbujt e lopëve, por ka bërë hapa pas në luftën kundër sëmundjes së tërbimit.
“Shqipëria nuk e vazhdoi fushatën e vaksinimit kundër rabisë. Duhet të merren masa të nevojshme për të përputhur veprimet duke ndjekur qasjen rajonale për kontrollin dhe eliminimin e rabisë”, thuhet më tej.
BE gjithashtu kërkon më shumë analiza dhe ndërtimin e një sistemi të ri laboratorësh në pika kufitare.
“Për rrjetin e laboratorëve zyrtarë duhen të dedikohen burime për kontrollin në kufi, në mënyrë që ato të kryhen sipas standardeve të BE-së,” theksohet në raport.
Në kapitullin 11, për bujqësinë dhe zhvillimin rural, Komisioni Evropian rikthen kërkesën për çeljen e programit IPARD. BE-ja thekson se Shqipëria duhet të rrisë kapacitetin dhe mbikëqyrjen për të fituar besimin për zbatimin e IPARD III, duke kujtuar se fondet u ndaluan tre vite më parë për shkak të keqpërdorimeve, kur paratë e qytetarëve europianë u përdorën nga elementë të botës së krimit, e jo nga fermerët.
