Policia e Shtetit ka hartuar një plan të posaçëm masash për garantimin e rendit dhe sigurisë para, gjatë dhe pas ndeshjes ndërkombëtare Shqipëri–Letoni, që zhvillohet sot në orën 20:45 në “Arenën Kombëtare” në Tiranë.
Forcat e rendit do të shoqërojnë futbollistët e të dy ekipeve dhe do të sigurojnë kontrolle të detajuara në stadium për të parandaluar futjen e sendeve të ndaluara. Në qytet dhe rreth stadiumit do të ketë patrullime dhe kufizime të qarkullimit, ndërsa parkimi i tifozëve do të organizohet në pika të posaçme.
Për shkak të masave të sigurisë, më 9 shtator, nga ora 17:00 deri në përfundim të ndeshjes, do të ketë kufizime në qarkullimin e mjeteve në disa akse rrugore kryesore pranë stadiumit, duke përfshirë Bulevardin “Dëshmorët e Kombit”, rrugën “Papa Gjon Pali II”, rrugën “Dervish Hima” dhe rrugë të tjera përreth.
Po ashtu, Policia paralajmëron se do të përdorë pajisje anti-dronë dhe se çdo akt dhune apo përdorim i lëndëve piroteknike do të ndëshkohet sipas ligjit. Hyrja në stadium nis në orën 18:00, dhe tifozët këshillohen të mos publikojnë biletat në rrjetet sociale për të shmangur falsifikimet. Masat janë marrë në bashkëpunim me FSHF-në, UEFA-n, Gardën e Republikës dhe shërbimet e emergjencës.
