Një dhuratë të veçantë për Shqipërinë në 113-vjetorin e Pavarësisë e pati pianisti Azem Haziri, i cili performoi në piano këngën e njohur të Vaçe Zelës, “Rrjedh në këngë e ligjërime”, në mes të Mynihut, në Gjermani.
Festa e Pavarësisë është një datë historike që ringjall më shumë se kurdoherë tjetër ndjenjën patriotike brenda zemrës së çdo shqiptari. Në këtë ditë të shenjtë, emocionet janë më të forta për diasporën shqiptare, e cila, larg vendit, ruan një mall të veçantë për atdheun dhe ndjen një lidhje të thellë me Shqipërinë, pavarësisht se jeton dhe punon në vendet e huaja.
Performanca e Hazirit në piano u prit me entuziazëm nga bashkëatdhetarët në Mynih, duke rikthyer përmes muzikës krenarinë, dashurinë dhe emocionet e veçanta që kjo ditë historike sjell për çdo shqiptar, kudo që ndodhet.
“Dashunia për atdhe ndjehet ma tepër në mërgim, prandej këtë dashuni ruje edhe kur të kthehesh n’ vendin t’and. Po ku ka si ti o Shqipëria ime. Urime 28 Nëntori”,- shkruan Haziri.
