“Do të hidhem nga pallati”, thotë një nga banoret e prekur, pas njoftimit që i është bërë sot nga zyra e përmbarimit për të lënë banesën e saj.
32 familje po nxirren nga banesat sociale të ndërtuara në vitin 1991 për familjet e pastrehë në zonën e plazhit pranë “rrotës së kuqe”. Bashkia Durrës dhe Ministria e Financave në vitin 2012 ia kanë shitur Mikel Noçka këto banesa, ndërkohë që banorët ende jetonin aty.
Edhe pse disa prej tyre vazhdojnë të kenë statusin e pastrehës, pas dy takimeve me kryetaren e bashkisë nuk është ofruar asnjë zgjidhje konkrete. Disa banorë deklarojnë se kryetarja i ka këshilluar të aplikojnë sërish për banesa sociale, duke u futur në radhën e 3,000 familjeve që presin prej vitesh.
Ndërkohë, gjykata e apelit nuk ka dhënë ende vendimin përfundimtar, pasi çështja është shtyrë pas vrasjes së gjyqtarit Astrit Kalaja, i cili pritej ta merrte për gjykim të mëtejshëm. Megjithatë, banorëve u është kërkuar sot të largohen nga banesat, kundër dëshirës së tyre.
