Fermerët e zonës së Myzeqesë po përballen këtë fillimviti me dëme të mëdha në kulturat bujqësore, të paprecedenta deri më tani. Përmbytjet kanë shkaktuar humbje të konsiderueshme dhe, edhe aty ku tokat i shpëtuan ujërave, ngricat e ditëve të para të vitit kanë dëmtuar rëndë prodhimin.
Një prej fermerëve të prekur është Fatjon Asllani nga zona e Zharrëzës, i cili është detyruar të asgjësojë të gjithë prodhimin e domateve në sera për shkak të ngricave. Të njëjtat probleme raportohen edhe në zonën e Frakullit, ku fermerët që kultivojnë luleshtrydhe dhe tranguj në sera kanë pësuar dëme të konsiderueshme.
Fermerët e prekur, si ata nga ngricat ashtu edhe nga përmbytjet, shpresojnë në ndërhyrjen e shtetit, të paktën për t’u krijuar mundësinë e rimbjelljes së tokave dhe rimëkëmbjes së aktivitetit bujqësor.
