Vaksina e moshës 1-vjeçare kundër fruthit nuk ka asnjë lidhje me autizmin. Deklarata vjen nga OBSH, e cila thotë se një analizë e re nga një komitet global ekspertësh për sigurinë e vaksinave ka zbuluar se, bazuar në provat e disponueshme, nuk ekziston lidhje shkakësore midis vaksinave dhe çrregullimeve të spektrit të autizmit (ASD).
Analiza e fundit, e diskutuar nga Komiteti më 27 nëntor 2025, u përqendrua në marrëdhënien midis vaksinave që përmbajnë tiomersal dhe ASD, si edhe në lidhjen midis vaksinave në përgjithësi dhe ASD. Provat e mbledhura nga 31 studime kërkimore të botuara midis janarit 2010 dhe gushtit 2025, duke përfshirë të dhëna nga vende të ndryshme, mbështesin fuqimisht profilin pozitiv të sigurisë së vaksinave të përdorura gjatë fëmijërisë dhe shtatzënisë, duke konfirmuar mungesën e çdo lidhjeje shkakësore me ASD.
OBSH u bën thirrje të gjitha autoriteteve kombëtare që të mbështeten në shkencën më të fundit dhe të sigurojnë që politikat e vaksinimit të bazohen në provat më të forta të disponueshme. Sipas saj, përpjekjet globale për imunizimin e fëmijëve përfaqësojnë një nga arritjet më të mëdha në përmirësimin e jetës dhe mirëqenies së shoqërive. Gjatë 50 viteve të fundit, imunizimi i fëmijëve ka shpëtuar të paktën 154 milionë jetë.
