Një rast me fruth është regjistruar së fundmi në Tiranë tek një fëmijë trevjeçar, i cili ndodhet i shtruar në spital që prej datës 22 dhjetor.
Sipas burimeve shëndetësore, fëmija ka lindur në Angli, por jetonte në Tiranë dhe rezulton i pavaksinuar me vaksinën kundër fruthit. Pas paraqitjes në spital, rasti është vënë nën hetim epidemiologjik nga Instituti i Shëndetit Publik, sipas protokolleve në fuqi.
Fëmija vijon të jetë nën kujdesin e mjekëve dhe gjendja e tij po monitorohet nga shërbimet spitalore.
Të dhënat zyrtare tregojnë se gjatë këtij viti në Shqipëri janë regjistruar 18 raste me fruth, krahasuar me 24 raste në vitin e kaluar. Pjesa më e madhe e këtyre rasteve janë konstatuar tek persona të pavaksinuar.
Ekspertët e shëndetit publik paralajmërojnë se ulja e mbulimit vaksinor po sjell rishfaqjen e rasteve me fruth në popullatë. Një nga arsyet kryesore të hezitimit të prindërve për vaksinimin e fëmijëve lidhet me pretendime të pavërtetuara mbi lidhjen e vaksinës së fruthit me autizmin, pretendime të cilat janë rrëzuar prej vitesh nga studime të shumta shkencore ndërkombëtare.
Fruthi është një sëmundje shumë ngjitëse dhe potencialisht e rrezikshme, e cila mund të sjellë komplikacione serioze shëndetësore dhe, në raste të rënda, edhe humbje jete, veçanërisht tek fëmijët e vegjël dhe personat e pavaksinuar.
