Një lëvizje e re qytetare ka nisur zyrtarisht rrugëtimin për të ndryshuar fatin e qindra fëmijëve shqiptarë që përballen me sëmundje të rënda. Një komitet nismëtar, i përbërë nga 15 qytetarë, i është drejtuar KQZ-së me një kërkesë emergjente: mundësimin e mbledhjes së firmave për një projektligj që garanton financimin shtetëror të trajtimeve shëndetësore të specializuara.
Projektligji i propozuar parashikon që shteti të marrë përsipër financimin e plotë të trajtimeve për fëmijët, qoftë brenda apo jashtë vendit, në rastet kur këto shërbime nuk ofrohen nga spitalet publike.
Sipas dokumentacionit të dorëzuar më 4 mars 2026, nisma synon:
• Garantimin e aksesit universal: Çdo i porsalindur dhe fëmijë me sëmundje të rëndë duhet të ketë akses të barabartë në kurim.
• Mbulimin e kostove të specializuara: Financimi i trajtimeve që sistemi publik aktualisht nuk i mbulon dot.
• Transparencë dhe llogaridhënie: Komiteti nismëtar angazhohet që i gjithë procesi të ndjekë parimet e transparencës ligjore.
Nisma ka marrë formë në qytetin e Korçës, ku 15 anëtarët e komitetit nismëtar kanë firmosur aktin e themelimit më 25 shkurt 2026. Tashmë, kërkesa është në tavolinën e Komisionerit Shtetëror të Zgjedhjeve, Ilirjan Celibashi, nga i cili kërkohet pajisja me fletët tip zyrtare për mbledhjen e nënshkrimeve të nevojshme nga zgjedhësit.
Deri më sot, shumë familje shqiptare janë detyruar t'u drejtohen thirrjeve publike për ndihmë apo rrjeteve sociale për të mbledhur shuma marramendëse për kurimin e fëmijëve të tyre jashtë vendit. Ky projektligj kërkon ta kthejë këtë nevojë nga një "lëmoshë" në një të drejtë të garantuar me ligj, megjithëkëtë, mbledhja e 20 mijë firmave të zgjedhësve nuk garanton miratimin e kësaj iniciative në Kuvend.
Qytetarët mund të propozojnë, por janë socialistët që votojnë.
