Nëse jeni mësuar të dëgjoni lajme për çunat e Dubait, këtë herë nga qyteti i famshëm vijnë lajme ndryshe. Bëhet fjalë për një projekt të madh zhvillimi, ku Shqipëria ka spikatur me prezencën e saj origjinale dhe moderne.
Në Future Hospitality Summit 2025, që po zhvillohet në Dubai, vendi ynë ka tërhequr vëmendjen me pavijonin “Soundscapes of Albania”, një bashkëpunim mes Agjencisë Kombëtare të Planifikimit të Territorit (AKPT), Agjencisë së Zhvillimit të Territorit (AZHT) dhe studios austriake Studio Precht.
Pavijoni është vlerësuar si një nga më të bukurit e samitit, duke prezantuar Shqipërinë përmes një përvoje ndijore që ndërthur imazhe arkitektonike me tingujt, kulturën dhe atmosferën shqiptare. Vizitorët përjetojnë një Shqipëri të gjallë, krijuese dhe në zhvillim, ku tradita bashkëjeton me vizionin modern të mikpritjes.
Në panelin “The Soundscapes of Hospitality” morën pjesë Michael Jalbert nga Forbes Global Properties, Adelajda Roka nga AZHT dhe Pablo Bofill nga Bofill Taller de Arquitectura. Ata theksuan se planifikimi i integruar, kornizat e qarta të investimeve dhe dizajni i udhëhequr nga komuniteti po e pozicionojnë Shqipërinë si një nga tregjet më premtuese në rajon për zhvillimin urban dhe turizmin e qëndrueshëm.
???? Me “Soundscapes of Albania”, Shqipëria fton botën të dëgjojë ritmin e saj — një vend në lëvizje, i hapur, krijues dhe gati për të ardhmen.
