Nën moton e “modernizimit të arsimit shqiptar”, duke filluar nga shtatori 2026, klasat e I, VI-ta dhe X-ta do kenë ndryshime të kurrikulës shkollore. Fokusi do të jetë aftësimi i nxënësve tek kompetencat kyçe të nxënësve, përfshirë gjuhën, matematikën dhe aftësitë digjitale.
Ministria e Arsimit dhe Sportit ka parashikuar një ndryshim të gjerë të teksteve shkollore, si pjesë e përditësimeve të reja në Kornizën Kurrikulare të Arsimit Parauniversitar.
Deri tani nuk ka një njoftim apo deklaratë zyrtare nga ky dikaster, por mësohet se tekstet e reja do të hyjnë në përdorim duke filluar nga shtatori i vitit 2026, fillimisht në këto klasa ndërsa zbatimi i plotë do të shtrihet deri në vitin 2029. Procesi do të realizohet gradualisht, për të garantuar që çdo fazë e ndryshimit të jetë e mirë përgatitur.
Në fokus të përditësimeve do të jenë edhe zhvillimi i të menduarit kritik, aftësive krijuese dhe zgjidhjes së problemeve, si dhe përfshirja e teknologjisë në mësimdhënie përmes platformave interaktive, projekteve dhe simulimeve.
Një pjesë e rëndësishme e reformës do t’i kushtohet laboratorëve “Smart”, kodimit dhe inteligjencës artificiale, me qëllim që nxënësit të përgatiten më mirë për profesionet e së ardhmes.
Aktualisht, mësohet se në lidhje me përgatitjen e mësuesve, është hartuar një plan i posaçëm trajnimi që do të shtrihet në disa vite. Përmes trajnimeve, seminareve dhe ëorkshop-eve, synohet që mësuesit të përfitojnë njohuritë e nevojshme për zbatimin efektiv të programeve të reja kurrikulare.
Vendimi për ndryshimin e teksteve nuk është marrë pa një studim paraprak. Ministria ka analizuar përvojat ndërkombëtare dhe praktikat më të mira në përditësimin e kurrikulave, duke marrë shembuj nga sisteme arsimore të suksesshme.
Një vëmendje e veçantë i është kushtuar edhe teksteve të përkthyera nga Oxford, Cambridge dhe Pearson, ku janë identifikuar problematika që lidhen me përshtatjen në kontekstin shqiptar. Tek këto tekste janë vënë re mospërputhje në zbatimin e njohurive në situata reale dhe në përdorimin e teknologjisë, çka do të përmirësohet në versionet e reja.
Ndryshimi i teksteve dhe përditësimi i kurrikulës pritet të ketë edhe një kosto financiare të konsiderueshme, por Ministria e Arsimit e konsideron këtë si një investim të domosdoshëm në cilësinë e arsimit.
