Pas 9 ditësh grevë urie, naftëtarët e Marinzës i kanë dërguar një letër kryeministrit Edi Rama, ku i kërkojnë ndërmjetësim për zgjidhjen e ngërçit mes tyre dhe kompanisë Bankers Petroleum, që administron vendburimin e naftës në Patos-Marinzë.
Në letër, Sindikata e Sektorit Hidrokarbur njofton kryeministrin për gjendjen e rënduar shëndetësore të grevistëve dhe i kërkon ndërhyrjen e institucioneve shtetërore.
Kërkesat e naftëtarëve përfshijnë rritjen e pagave dhe përmirësimin e kushteve të punës, zbatimin e Statusit të Naftëtarit, promovimet në bazë të meritës, barazinë në shpërblime dhe uljen e diferencave ekstreme mes pagave të ulëta dhe të larta. Ata e konsiderojnë përmbushjen e këtyre kërkesave si kusht kryesor për t’u rikthyer në vendin e punës.
Gjatë grevës, vendburimi po funksionon me numër minimal punonjësish, të cilët përballen me volum të madh pune dhe orare të tejzgjatura që tejkalojnë kufijtë ligjorë, duke rrezikuar shëndetin e tyre. Naftëtarët raportojnë gjithashtu intimidim nga menaxherët e kompanisë për t’u paraqitur në zyrat e tyre.
Kërkesa e tyre ndaj kryeministrit erdhi pas një takimi me përfaqësues të Bankers Petroleum, të cilët deklaruan se nuk mund të miratojnë rritje pagash për shkak të presioneve financiare, përfshirë rënien e çmimeve të naftës në 60 dollarë për fuçi dhe parashikimet për ulje të mëtejshme vitin e ardhshëm.
Naftëtarët kërkojnë nga kryeministri Rama trajtim dinjitoz, ndërmjetësim dhe zgjidhje të drejtë e të qëndrueshme për situatën.
