Pas mbledhjes së Grupit Teknik Ndërsektorial, është vendosur që tre fëmijët dhe nëna e tyre, Blerina Basha, të asistohen menjëherë me ndihmë mjekësore dhe sociale.
Ndihma do të nisë fillimisht me sigurimin e të gjitha medikamenteve të nevojshme për trajtimin e sëmundjes infektive të zgjebes. Ata do të qëndrojnë në spital deri në shërimin e plotë nga kjo sëmundje ngjitëse, ndërsa më pas do të vijojë mbikëqyrja sociale në banesë. Bashkë me trajtimin e tyre, do të kryhet pastrimi dhe dezinfektimi i apartamentit të familjes.
Në mbledhjen e GTN-së, ku morën pjesë përfaqësues të Shërbimit Social, Policisë, Shëndetësisë dhe organizatave jofitimprurëse, u dakordësua një plan i koordinuar ndërhyrjeje për forcimin dhe riintegrimin e familjes.
Tre fëmijëve u janë siguruar veshmbathje dhe pritet të marrin të gjitha medikamentet e nevojshme për trajtimin e sëmundjes. Financimi i ndërhyrjeve mjekësore dhe sociale do të realizohet nga organizatat Nisma ARSIS dhe World Vision.
Ndërkohë, do të nisë procesi i pasaportizimit dhe zhvendosjes së regjistrimit të familjes në Durrës, që aktualisht figuron e regjistruar në Vau i Dejës. Regjistrimi i ri si banorë të qytetit do t’u mundësojë përfshirjen në skemat e strehimit social të bashkisë.
Për nënën e fëmijëve, përmes Zyrës së Punës do të vlerësohet mundësia për një punë të rregullt 8-orëshe, në mënyrë që ajo të kujdeset dhe të mirërrisë fëmijët, pasi aktualisht punon deri në 16 orë. Ajo do të përfitojë gjithashtu mbështetje psiko-sociale.
Shërbimi Social do të kryejë kontrolle dhe mbikëqyrje të përditshme për mbarëvajtjen e situatës familjare. Nëna do të jetë në një periudhë prove për të vlerësuar aftësinë e saj për kujdestarinë, me qëllim përfundimtar mbajtjen e familjes së bashku dhe garantimin e interesit më të lartë të fëmijëve.
