Në ditën e nëntë të grevës së urisë pa afat, tre punonjës të vendburimit të naftës, Dorjan Dylmishi, Dritan Rrapushi dhe Eduart Selami, kanë shfaqur probleme shëndetësore për shkak të luhatjeve të tensionit. Të tre janë trajtuar me injeksione nga personeli mjekësor, ndërsa Eduart Selami, në gjendje më të rënduar, është transportuar drejt Spitalit Rajonal të Fierit për ndihmë të specializuar.
Kreu i Sindikatës së Punonjësve të Naftës, Dritan Shahu, deklaroi se, pavarësisht përkeqësimit të gjendjes shëndetësore të grevistëve, protesta do të vazhdojë deri në plotësimin e kërkesave.
“Vendburimi i naftës po shkon drejt kolapsit, ndërsa kompania vijon me papërgjegjshmëri të mos marrë në konsideratë kërkesat e drejta të punonjësve. Shëndeti i atyre pak punonjësve që janë ende në punë po rrezikohet, madje edhe vetë funksionimi i vendburimit,” tha Shahu, duke paralajmëruar përshkallëzim të mëtejshëm të grevës.
Ndërkohë, kompania “Bankers Petroleum” vijon të mbajë të njëjtin qëndrim, duke mos ofruar asnjë zgjidhje konkrete për grevistët.
