Një person i cilësuar si i rrezikshëm për sigurinë kombëtare është ndaluar këtë pasdite në aeroportin e Rinasit. Bëhet fjalë për predikuesin fetar Imran Hosein, i njohur ndërkombëtarisht, i cili kishte mbërritur nga Trinidad dhe Tobago në Amerikën e Jugut me destinacion Shqipërinë.
Sipas burimeve zyrtare, autoritetet shqiptare të sigurisë kishin informacione që e lidhin Hosein me vepra të mundshme terrorizmi, çka ka bërë që policia kufitare të mos i lejojë hyrjen në territorin shqiptar.
Aktualisht, ai po mbahet në ambientet e kontrollit kufitar në Rinas, ndërsa po finalizohet procedura për kthimin e tij në vendin e origjinës.
Burime nga organet e rendit bëjnë me dije se vendimi për ndalimin e hyrjes është marrë në bazë të vlerësimeve të strukturave të sigurisë, të cilat e kanë klasifikuar Hosein si person që përbën kërcënim për sigurinë kombëtare.
