Pas muajsh pritjeje dhe procedurash institucionale, është dhënë miratimi për vendosjen e stolit përkujtimor në nder të Martin Cani. Stoli do të vendoset të martën, më 26 shkurt, në ambientet e shkollës 9-vjeçare “Fan S. Noli” në Tiranë, si një simbol kujtese dhe reflektimi për nxënësit, mësuesit dhe gjithë shoqërinë.
Në një shkresë zyrtare të datës 9 dhjetor 2025, Zyra Vendore e Arsimit Parauniversitar Tiranë shprehte dakordësinë për vendosjen e stolit përkujtimor, ndërsa sqaronte se procedurat për objekte të tilla në ambientet shkollore janë në kompetencë të pushtetit vendor, konkretisht të Këshillit Bashkiak të Tiranës, sipas legjislacionit në fuqi.
Familja e Martinit dhe komuniteti i prindërve e kanë cilësuar vendosjen e stolit si një akt domethënës për të mos harruar tragjedinë dhe për të ndërgjegjësuar brezat e rinj mbi pasojat e dhunës. Ata theksojnë se kujtesa duhet të shërbejë si thirrje për më shumë komunikim mes shkollës dhe familjes, si dhe për rritjen e sigurisë në institucionet arsimore.
Më herët, pas refuzimit fillestar për vendosjen e stolit në ambientet e shkollës, familja dhe grupimi qytetar “Prindër për Arsim Cilësor” e kishin vendosur atë pranë banesës së tyre, duke pritur përgjigjet zyrtare nga institucionet. Tashmë, me përfundimin e procedurave, stoli do të marrë vendin e tij në shkollë, aty ku Martinit i ishte ndërprerë jeta tragjikisht një vit më parë.
Familjarët e konsiderojnë këtë një kujtim të përhershëm, jo vetëm për djalin e tyre, por edhe si një mesazh për përgjegjësi të përbashkët të prindërve, mësuesve dhe institucioneve, në mënyrë që ngjarje të tilla të mos përsëriten më.
