Një tjetër qytetar nga diaspora ka drejtuar kritika ndaj qeverisë në Samitin e Diasporës që po mbahet në Tiranë. Ish-minatori nga Bulqizë ngriti shqetësime lidhur me mosmiratimin e statusit të minatorit, duke theksuar se ky premtim i përsëritur që nga viti 2013 nuk është realizuar ende.
Për të treguar mungesën e seriozitetit nga ana e qeverisë, ai solli në vëmendje edhe deklaratën e deputetit socialist Vullnet Sinaj, që krahasonte këtë profesion me atë të balerinëve.
“Unë kam punuar në minierën e Bulqizës. Nuk u miratua ligji për statusin e minatorit, është premtuar që në 2013. E kemi përgëzuar dhe e kemi votuar, se Bulqiza ka qenë e djathtë. I dhamë votën, akoma asgjë. Më e keqja, një deputet i krahasoi minatorët me balerinat e operës, një fyerje e rëndë”, u shpreh ai.
Më pas, ai vijoi me kritika për Paketën e Maleve dhe çështja e pronave. Minatori deklaroi se ka hasur vështirësi në marrjen e pronës së gjyshërve, pavarësisht kërkesave të përsëritura. Në përgjigje, ministri Taulant Balla u shpreh se Paketa e Maleve synon pikërisht adresimin e problematikave të krijuara nga ligji 7501.
Ai shtoi gjithashtu se një deputet ka krahasuar minatorët me balerinat e operës, duke e cilësuar këtë një fyerje të rëndë ndaj minatorëve.
Në përfundim, ai theksoi se diaspora duhet të ketë më shumë hapësirë reale për t’u dëgjuar në këto forume, duke pretenduar se shpesh trajtohet si numër dhe jo si zë me ndikim.
Vlen të theksohet se gjatë ngritjes së shqetësimeve, qytetarit disa herë iu tentua t’i merrej mikrofoni dhe t’i hiqej fjala.
