Asosacioni i Gazetarëve të Shqipërisë i është bashkuar nismës globale për të kujtuar gazetarët e vrarë në Gaza dhe për të kërkuar mbrojtjen e tyre. Përmes një deklarate, ata i kërkojnë qeverisë shqiptare të mbajë qëndrim të qartë përballë gjenocidit dhe të ngrejë zërin për lirinë e shtypit. Sot, më 1 shtator, gazetarë nga e gjithë bota përcjellin mesazhin e përbashkët: “Nuk jeni vetëm”.
Postimi
Që nga nisja e luftës, rreth 200 gazetarë janë vrarë në Gaza, duke lënë pas familje që humbën bijtë dhe bijat, fëmijë që humbën prindërit,gazetarë që humbën kolegët dhe redaksi të trishtuara e me lajme të cunguara.
Shteti i Izraelit nuk lejon asnjë media ndërkombëtare të raportojë të vërtetat nga Gaza. Ndaj barra e lajmeve nga ajo zonë lufte u ka rënë gazetarëve palestinezë që janë qëlluar dhe janë vrarë me kamerën apo telefonin ende në dorë duke raportuar në kohë reale në çdo cep të globit.
Sot, më 1 shtator, media dhe gazetarë nga e gjithë bota bashkohen për të thënë: “Nuk jeni vetëm”. Edhe Shqipëria është pjesë e kësaj nisme duke i kërkuar qeverisë të mbajë qëndrim të qartë përballë gjenocidit dhe të ngrejë zërin për mbrojtjen e gazetarëve.
Le të kujtojmë letrën e lamtumirës të gazetarit të ri të Al Jazeera-s, Anas al-Sharif, i vrarë në fillim të gushtit nga një sulm ajror izraelit. Ai shkruante: “Mos harroni Gazën.”
Sot, me zërat tanë të bashkuar, ne themi:
Gaza nuk harrohet. Gazetarët nuk harrohen. E vërteta nuk heshtet.
#BASHKOHU
#MbroniGazetarëtnëGaza
#LejoniGazetarëtnëGaza
#ProtectJournalistsinGaza
#LetReportersintoGaza
