Me një qëndrueshmëri të admirueshme dhe pasion të rrallë për sportin, 64-vjeçari Ferdinand Varfi ka përfunduar sfidën e radhës personale: përshkimin në këmbë të distancës nga Tepelena në Fier, për vetëm 8 orë. Ky nuk është aktiviteti i tij i parë, por pjesë e një tradite të gjatë që ai e ka nisur që në moshën pesëvjeçare, duke e kultivuar ecjen dhe vrapin si mënyrë jetese. Edhe pse nuk ka marrë pjesë në gara zyrtare, Varfi tregon se trofetë dhe rekordet nuk do t’i mungonin nëse do të garonte në nivel kombëtar.
I njohur si “maratonomak i përjetshëm”, ai shpjegon se motivi kryesor i këtyre sfidave është dashuria dhe dëshira për t’i treguar bashkëshortes se vazhdon të jetë në formë dhe plot energji, pavarësisht moshës. Varfi ecën i vetëm, pa shoqërues, shpesh në shtigje malore, duke thyer çdo herë rekorde personale.
Pas përfundimit të kësaj maratone, 64-vjeçari shprehet se sfida e tij e ardhshme është ndërkombëtare: ëndërron të realizojë një maratonë personale në Dubai, një hap që do ta bënte të njihej edhe jashtë Shqipërisë.
