-Nga Agim Xhafka
Pa pushuar ende shirat Balluku së pari e më tej Rama premtuan që do të zhdëmtonin realisht çfarë solli katastrofa e ujrave. Seriozë dhe krenarë u shfaqën fiks si qeveritarë dinjitozë. Por që atë sekondë populli i përqeshi. Nga që e di se rrena është strategjia e ekipit që na drejton prej 13 vitesh. Ende bujqit nuk kanë marrë pagesat e përmbytjeve të viteve para, ende shqiptarët nuk kanë marrë pagesat e dëmeve nga tërmeti, madje disave iu prishën dhe pallatet gjoja të dëmtuara që oligarkët aty të ngrenë kullat e tyre. E qershia mbi tortë qe analiza e ministrit të financave. Që pasi grumbulloi para nga disa kanale të buxhetit, nga emergjencat e të tjera, deklaroi që shuma e dëmshpërblimit do të jetë 50 milionë euro. Kur dëmi e pakta shkon 1 miliardë euro e kacafiu. Pra po ushqejnë elefantin me lugë kafe kuptohet.
Një propagandë e tillë ngjan me gostinë që do të shtronin dy shokë.
-Ti sill mishin, perimet, frutat, ëmbëlsirat, shishet e verës, -i tha njëri shokut të vet.
-Po ti? Çfarë do sjellësh ti? Se s’ngeli gjë!
-Unë do sjell nga çezma ime ujin që ti do të përdorësh për supën e gostisë!- u mburr shoku.
Kështu dhe Rama. Me 50 milionë euro as ujin e supës nuk paguan dot. Se dhe aq lëng për mijra e mijra të përmbytur kushton më shumë.
