Autoritetet kroate kanë bllokuar një tjetër ngarkesë me produkte ushqimore të ardhura nga Shqipëria, këtë herë një sasi kremi fistikësh (pasta pistachio), pas konstatimit të pranisë së një toksine helmuese.
Sipas njoftimit të publikuar në Sistemin Evropian të Alarmit të Shpejtë për Ushqimet dhe Ushqimin për Kafshë (RASFF), ngarkesa me “pastën e fistikëve” apo gjalpin e fistikëve që vinte nga Shqipëria është ndaluar në kufi nga autoritetet kroate për shkak të pranisë së lartë të aflatoksinës, një substancë e dëmshme për shëndetin e njeriut.
Mostrat për analizim janë marrë nga autoritetet kroate më 8 shtator, dhe pas testimeve laboratorike, është konfirmuar se produkti përmbante nivel të lartë të aflatoksinës, shumë mbi normat e lejuara nga Bashkimi Evropian. Për pasojë, i gjithë ngarkimi është asgjësuar.
Njoftimi zyrtar për këtë rast është bërë publik më 3 tetor 2025, në mënyrë që edhe shtetet e tjera anëtare të BE-së, të cilat mund të kenë pranuar të njëjtin produkt nga Shqipëria, të ndërmarrin masa për ndalimin e tregtimit dhe përdorimit të tij.
Ky është rasti i dytë brenda pak javësh që një produkt ushqimor me origjinë shqiptare bllokohet në kufijtë e BE-së për shkak të standardeve të papërshtatshme të sigurisë ushqimore, duke ngritur shqetësime mbi kontrollin cilësor dhe proceset e certifikimit në eksportet shqiptare.
Aflatoksina është një toksinë natyrale që prodhohet nga disa lloje kërpudhash (si Aspergillus flavus dhe Aspergillus parasiticus) dhe që mund të zhvillohet në produkte bujqësore si arrat, kikirikët dhe fistikët, kur ato ruhen në kushte të papërshtatshme lagështie ose temperature. Konsumimi i ushqimeve të kontaminuara me aflatoksinë mund të shkaktojë probleme serioze shëndetësore, përfshirë dëmtime të mëlçisë dhe rritje të rrezikut për kancer hepatik.
