Aktivisti Kristi Pinderi ka reaguar ndaj debatit të fundit politik për barazinë gjinore dhe Konventën e Stambollit, duke vënë në qendër të kritikave ish-kryeministrin Sali Berisha – të cilin e konsideron si personin që, me insistimin e tij, ka futur për herë të parë konceptin e identitetit gjinor në legjislacionin shqiptar.
Në një postim publik, Pinderi thekson se Konventa e Stambollit, e ratifikuar gjatë qeverisë Berisha 2, jo vetëm që përcakton gjininë mbi bazën burrë–grua, por gjithashtu garanton mosdiskriminim mbi bazë të orientimit seksual dhe identitetit gjinor.
Ai kujton gjithashtu se ligji për mbrojtjen nga diskriminimi, ku përmendet sërish identiteti gjinor, është miratuar po ashtu gjatë periudhës kur Sali Berisha drejtonte qeverinë.
Pjesë nga reagimi i Kristi Pinderit:
“Konventa e Stambollit e ratifikuar gjatë kohës së qeverisë Berisha 2… siguron mosdiskriminim mbi asnjë bazë, si… orientimi seksual, identiteti gjinor…”
“Ligji për barazinë gjinore përdor të njëjtën gjuhë. Hera e dytë kur identiteti gjinor përmendet është te ligji për mbrojtje nga diskriminimi. Edhe ky është miratuar me këmbënguljen e Doktorit!
“Pra, në të dyja herët që Shqipëria afirmon konceptin e identitetit gjinor në legjislacion… personi që ka këmbëngulur është Sali Berisha.”
“Për këto arsye, Berisha do të jetë – me dashje a pa dashje – një asterisk i përjetshëm në historinë e LGBT në Shqipëri ✌️✌️”
Postimi i Pinderit erdhi si kundërpërgjigje ndaj debateve të fundit të opozitës mbi projektligjet dhe konventat që trajtojnë çështjet e barazisë dhe mosdiskriminimit.
