Një numër i madh fluturimesh në mbarë botën është prekur sot nga anulime dhe vonesa, pasi Airbus lëshoi një urdhër urgjent për rikthim softueri në rreth 6 000 avionë të familjes A320.
Ky është një nga modelet më të përdorur të avionëve të pasagjerëve në botë, dhe masa e menjëhershme ka shkaktuar pengesa të konsiderueshme në operacionet ajrore, sipas Reuters.
Urdhri erdhi pas një incidenti të muajit të kaluar, kur një avion i JetBlue pësoi rënie të papritur të lartësisë për shkak të një defekti në softuerin e kontrollit të fluturimit. Hetimet zbuluan se modeli A320 ka nevojë për përditësime të detyrueshme, ndërsa në disa avionë kërkohet edhe ndërhyrje teknike shtesë.
Si rezultat, shumë kompani ajrore ndërkombëtare, përfshirë American Airlines, Air France, Lufthansa, Avianca dhe të tjera , kanë njoftuar anulime, vonesa ose riorganizime të orareve të fluturimeve.
Linjat ajrore po përpiqen të zbatojnë përditësimet gjatë natës për të shmangur ndërprerje të mëtejshme, por pritet që pasojat të ndihen gjatë gjithë fundjavës.
Zyrtarë të aviacionit në Evropë, Azi dhe SHBA janë vënë në gatishmëri për të mbikëqyrur procesin e rikthimit të softuerit dhe sigurinë e avionëve përpara rikthimit të tyre në operim normal.
Sipas Reuters, situata po sjell vonesa dhe shqetësime të mëdha për udhëtarët, në një periudhë me fluks të lartë udhëtimesh, duke krijuar një prej ndërprerjeve më të mëdha ajrore të muajve të fundit.
Po Rinasi?
Në aeroportin e Rinasit, sipas një vëzhgimi në faqen zyrtare, pjesa më e madhe e fluturimeve janë nisur normalisht. Dhe të tjerat janë në proces. Por ka pasur dhe anulime, si Air Albania drejt Milanos në mesditë, që është anuluar.
Situata drejt normalizimit
Në ditët e fundit, disa linja ajrore kanë njoftuar se pjesë e avionëve të tyre tashmë i janë nënshtruar përditësimit dhe janë rikthyer në operim. Për shembull, American Airlines tha se shumica e avionëve të tij A320 do të jenë gati për fluturim deri këtë fundjavë.
Në disa raste, përmirësimet u arritën gjatë natës pa sjellë më shumë probleme , pasi zgjidhja ishte kryesisht softuerik./Monitor
