Nata mes 6 dhe 7 janarit u shndërrua në kaos në aeroportin e Brindisit, pasi dy fluturime të kompanisë Wizz Air me destinacion Tiranën, që vinin nga Bergamo dhe Bolonja, u devijuan drejt aeroportit të Salentos për shkak të kushteve të këqija të motit në Shqipëri.
Vendimi për devijimin e avionëve shkaktoi reagime të ashpra nga një pjesë e pasagjerëve, të cilët u grumbulluan në pistë, duke detyruar ndërhyrjen e forcave të rendit për rikthimin e qetësisë dhe garantimin e sigurisë.
Sipas autoriteteve italiane, tre persona me origjinë shqiptare, të identifikuar përmes kamerave të sigurisë së aeroportit, dyshohet se kanë pasur rol kyç në përshkallëzimin e situatës. Ata akuzohen për sjellje agresive dhe për nxitjen e pasagjerëve të tjerë për t’iu bashkuar protestës.
Prokuroria e Brindisit ka nisur hetime ndaj tyre për disa vepra penale, përfshirë prishje të shërbimit publik, sulm dhe kërcënime ndaj një zyrtari publik, dëmtim të rëndë të pronës publike, pushtim arbitrar të ambienteve publike si dhe shkelje të rregulloreve të sigurisë aeroportuale.
Tre të dyshuarit u identifikuan gjatë kontrolleve kufitare në terminalin e Costa Morena-s, në momentin kur po përgatiteshin të hipnin në tragetin drejt Vlorës. Ndërkohë, pasagjerët e tjerë u përballën me orë të tëra tensioni dhe u detyruan të braktisnin udhëtimin ajror drejt Shqipërisë.
Sipas raportimit të Corriere, në fund të gjithë pasagjerët u kthyen në Shqipëri duke përdorur mjete alternative udhëtimi.
