Një kantier ndërtimi i hapur pranë kopshtit nr. 43 dhe çerdhes nr. 26 në Tiranë ka ngritur shqetësim të madh tek prindërit, pasi zhurma e vazhdueshme e punimeve po zhvillohet pranë ambienteve ku qëndrojnë çdo ditë dhjetëra fëmijë të vegjël.
Sipas prindërve, ndërsa në kantier vazhdojnë punimet për ndërtimin e një pallati, vogëlushët në kopsht dhe çerdhe duhet të përpiqen të përqendrohen në aktivitetet e tyre ditore apo të flenë gjumin e drekës mes zhurmës së makinerive dhe punimeve të ndërtimit.
Problemi bëhet edhe më shqetësues për faktin se, sipas lejes së ndërtimit, punimet për pallatin janë parashikuar të zgjasin deri në pesë vite, çka do të thotë se fëmijët do të përballen për një kohë të gjatë me të njëjtën situatë.
Prindërit thonë se kanë paraqitur ankesa për këtë problem, por deri tani Drejtoria e Kopshteve dhe Çerdheve në Tiranë nuk ka marrë masa konkrete për të gjetur një zgjidhje.
Sipas tyre, institucionet nuk kanë ndërmarrë asnjë hap për të spostuar përkohësisht fëmijët në ambiente të tjera gjatë kohës së ndërtimit dhe as për të kërkuar nga kompania ndërtuese që punimet të kryhen jashtë orarit mësimor, në mënyrë që të mos ndikojnë tek fëmijët.
Prindërit kërkojnë ndërhyrje të menjëhershme të institucioneve përgjegjëse, duke theksuar se shëndeti dhe qetësia e fëmijëve duhet të jenë përparësi, përpara çdo projekti ndërtimi.
