Punonjës të Urgjencës në Spitali Universitar “Nënë Tereza” kanë ngritur shqetësimin për bllokimin e hyrjes së godinës së urgjencës, duke e cilësuar këtë situatë si një pengesë serioze për mbarëvajtjen e punës së përditshme.
Sipas tyre, mbyllja e hyrjes ka ndikuar drejtpërdrejt në lëvizjen e shpejtë dhe efikase të stafit mjekësor. Ata shprehen se janë të detyruar të përdorin hyrje alternative, duke lëvizur rreth e rrotull ambienteve të spitalit ose duke hyrë nga kati -1, çka rrit rrezikun për vonesa në ndërhyrjet emergjente dhe në dhënien e ndihmës për pacientët në gjendje kritike.
Shqetësime kanë ngritur edhe pacientë dhe familjarë, të cilët e konsiderojnë të pajustifikuar bllokimin e hyrjes së urgjencës. Sipas tyre, ky ndryshim po krijon vështirësi të mëdha, sidomos për të moshuarit dhe personat me probleme shëndetësore, për të cilët çdo metër shtesë në kushte urgjence përbën rrezik.
