Në tetor - nëntor 1936, publiku amerikan u njoh për herë të parë me historinë epike të heroit kombëtar shqiptar, Skënderbeut, falë ilustrimeve të ilustruesit të njohur amerikan J. Carroll Mansfield. Veteran i Luftës së Parë Botërore në Evropë, Mansfield, solli një kontribut unik në edukimin vizual të historisë përmes serisë së tij të famshme “Highlights of History”. Ky botim, i publikuar në suplementet e së dielës të gazetave amerikane, ilustroi historinë e heroit kombëtar shqiptar përmes 23 ilustrimesh, duke e prezantuar Skënderbeun si një figurë historike që udhëhoqi rezistencën arbërore kundër Perandorisë Osmane.
Lindur më 4 janar 1899 në Baltimore, Maryland, James Carroll Mansfield rriti pasionin për historinë dhe vizatimin që nga fëmijëria, i frymëzuar nga një ambient liberal dhe prindërit e tij, i ati një tregtar i suksesshëm dhe një nënë e angazhuar në aktivitetet baptiste. Seria e tij, e nisur më 1924 dhe zgjeruar me një version me ngjyra në 1926, u bë një hit kombëtar, duke u promovuar si një mjet edukativ historik për miliona amerikanë. ndryshe nga komikset tradicionale. Episodi i parë filloi ciklin me ilustrime të heroit kombëtar, duke e paraqitur Skënderbeun mbi një kalë me flamurin shqiptar si simbol i rezistencës, duke treguar origjinën e tij, konvertimin e detyruar në Islam dhe arratisjen nga sundimi osman për të udhëhequr popullin e tij. Ilustrimet përfshijnë një hartë të Ballkanit për kontekstin gjeografik dhe skena të bisedave me sulltanin, me ngjyra të gjalla dhe detaje të pasura që theksojnë kostumet historike dhe peizazhet.
Pjesa e dytë, gjithashtu, përqendrohet në betejat e hershme, duke e shfaqur Skënderbeun tek organizonte rezistencën kundër osmanëve dhe mbrojtjen e fortesave si Krujën. Ilustrimet përfshijnë skena luftarake dinamike dhe një hartë që tregon lëvizjet e tij në Shqipëri, si dhe momentet e negociatave me armiqtë, me ngjyrat e errëta dhe kontrastet që theksojnë dramacitetin e betejave.
Pjesa e tretë, e datës 8 nëntor 1936, vazhdon me rezistencën, duke treguar Skënderbeun që organizon sulme kundër forcave osmane dhe rrethimin e Krujës. Ilustrimet përfshijnë skena të strategjive ushtarake, një hartë të zonave të kontrolluara dhe peizazhe malore të Shqipërisë dhe fitoret e tij.
Mansfield përmes ilustrimeve të tij të detajuara dhe teksteve të kuptueshme, ai e bëri Skënderbeun të njohur për lexuesit amerikanë, duke kontribuar në përhapjen e historisë botërore përmes një formati vizual inovativ për kohën.
