56 studentë të Akademisë së Sigurisë përfunduan me simptoma helmimi pas konsumimit të ushqimit, ndërsa Autoriteti Kombëtar i Ushqimit ka reaguar zyrtarisht lidhur me ngjarjen.
Sipas njoftimit të AKU-së, menjëherë pas marrjes së informacionit për rastin janë kryer verifikime në subjektin “SORI-AL”, kompania që ushtron shërbimin e catering-ut pranë Akademisë së Sigurisë në Sauk. Ushqimi, sipas AKU-së, prodhohej në ambientet e garnizonit “Skënderbej” pranë Akademisë së Forcave të Armatosura në Tiranë dhe më pas shpërndahej në akademi.
Gjatë kontrollit në kuzhinën e vendosur brenda ambienteve të Akademisë së Sigurisë, inspektorët konstatuan pilaf, makarona, fasule, sallam dhe kos të hapur gati për shërbim. Nga këto produkte u bllokuan 85.9 kilogramë ushqime dhe u morën mostra për analiza mikrobiologjike, të cilat janë dërguar në laboratorin e ISUV. AKU bëri me dije se subjekti ushtronte aktivitetin në kushte të përshtatshme higjieno-sanitare, por gjatë verifikimeve u evidentua mungesa e një sistemi funksional dhe të plotë gjurmimi të produkteve ushqimore.
Për këtë arsye ndaj subjektit “SORI-AL” u vendos masë administrative me gjobë në vlerën e 100 mijë lekëve.
Ndërkohë, priten rezultatet e analizave laboratorike për të përcaktuar shkakun e helmimit të studentëve.
