Varianti K i virusit të gripit, i cili ka alarmuar shumë vende në botë, ende nuk është identifikuar në Shqipëri. Ekspertët e Institutit të Shëndetit Publik konfirmojnë se zyrtarisht ka nisur sezoni i gripit, por Laboratori i Virologjisë deri tani ka regjistruar vetëm raste me nëntipet Ah1n1 dhe Ah3n2.
Sipas specialistëve, nëntipi Ah3n2, i cili po qarkullon këtë dimër, ka pësuar ndryshime gjenetike që përfshijnë edhe shfaqjen e nënvariantit K. Komitetet shkencore ndërkombëtare paralajmërojnë se ky variant është shumë ngjitës dhe mund të rrisë numrin e shtrimeve në spitale.
Autoritetet shëndetësore ndërkombëtare, përfshirë OBSH dhe ECDC, kanë vënë re se vaksina e gripit ka efikasitet më të ulët ndaj këtij mutacioni, i cili po qarkullon gjerësisht në Europë. Megjithatë, dr. Iris Hasibra, përgjegjëse në Laboratorin e Virologjisë, thekson se nuk ka vend për panik, duke shtuar se klimë e ndryshme në Shqipëri mund të ndihmojë në uljen e ashpërsisë së gripit dhe të këtij nënvarianti.
Organizata Europiane Shëndetësore paralajmëron se qarkullimi i lartë i nënvariantit K mund të përshpejtojë pikun e infektimeve dhe të rrisë shtrimet në spitale. ECDC rekomandon kryerjen e vaksinës së gripit, e cila përfshin shtamin Ah3n2, nga i cili ka dalë mutacioni K.
