Këngëtari i famshëm grek Giorgos Mazonakis prej katër ditësh ndodhet i shtruar në spitalin psikiatrik “Dromokaiteio”, pas një urdhri të prokurorit. Ai u shtrua në klinikë mesditën e së enjtes së kaluar, duke shkaktuar reagime të shumta në opinionin publik dhe botën e artit grek. Sipas mediave helene, ekzistojnë dyshime se shtrimi i tij në klinikë është kryer me “marifete” nga e motra dhe i ati, të cilët prej kohësh kanë pasur përplasje me këngëtarin për çështje të ardhurash dhe pasurie. Motra e artistit ka qenë më herët menaxhere e karrierës së tij, por marrëdhëniet mes tyre janë tensionuar, çka ka sjellë konflikte të vazhdueshme.
Pas publikimit të lajmit, një lumë reagimesh ka shpërthyer në rrjetet sociale dhe në mediat greke. Artistë, personalitete publike dhe qytetarë të shumtë kanë shprehur indinjatën e tyre, duke e cilësuar rastin si të papranueshëm dhe turpërues. Ata kanë bërë thirrje që këngëtari të lirohet menjëherë dhe të rikthehet në shtëpi. Sipas tyre, edhe në rast se ekziston nevoja për trajtim mjekësor, mënyra se si është kryer shtrimi i tij është e papërshtatshme dhe dëmton rëndë figurën e një artisti të kalibrit të tij.
Nga ana tjetër, familjarët e Mazonakis nuk kanë reaguar ende publikisht mbi akuzat.
Ndërkohë, avokati i këngëtarit ka deklaruar për mediat greke se prej më shumë se dy vitesh Mazonakis nuk ka asnjë kontakt me familjarët, pasi ndodhen në një proces gjyqësor për çështje pronësie. Ai tha se këngëtari është i shëndetshëm, por i tronditur nga mënyra e shtrimit në spital.
“Jorgo është shumë mirë, megjithëse i trishtuar për mënyrën e tmerrshme se si u mbyll në klinikë nga pjesëtarët e familjes, por është plotësisht i shëndetshëm. Prej dy vitesh nuk ka asnjë kontakt me familjarët, pasi jemi në gjyq për pasurinë. Në shtator kishim planifikuar të bënim disa denoncime për abuzime të rënda të motrës së tij, dhe tani ndodhi kjo,” – deklaroi avokati.
Ai theksoi se një situatë e tillë mund të ndodhë me çdo person, pasi sipas ligjit, kushdo mund të paraqitet në prokurori dhe të kërkojë shtrimin e një familjari në klinikë, me pretendimin se nuk është i shëndetshëm mendërisht, pa kryer më parë një kontroll të detajuar.
“Kini parasysh që ai u mor në një ditë feste, kur institucionet ishin pushim. Para një muaji familjarët e tij kanë shkuar në shtëpinë e tij për të biseduar, por ai nuk i pranoi dhe u kërkoi të largoheshin. Ndërkohë, katër muaj më parë ndodhi një takim me motrën e tij në praninë time, ku u tentua të gjendej një zgjidhje për problemet që janë në gjyq, por pa rezultat, dhe seancat gjyqësore do të vazhdojnë,” – shtoi më tej avokati.
