Administrata Amerikane e Ushqimit dhe Barnave (FDA) ka miratuar ilaçin e kompanisë Vanda Pharmaceuticals për parandalimin e të vjellave të shkaktuara nga lëvizja, duke shënuar trajtimin e parë të ri për këtë problem që nga më shumë se 40 vjet. Ilaçi, i quajtur Nereus (i njohur edhe si tradipitant), pritet të hidhet në treg në muajt e ardhshëm.
Miratimi u bazua në dy studime klinike të fazës së avancuar me 681 pacientë, ku u tregua se ilaçi ul ndjeshëm të vjellat. Ai vepron duke bllokuar një receptor në tru që lidhet me të përzierat dhe të vjellat, të shkaktuara nga sinjale të çrregullta mes syve, veshit të brendshëm dhe trupit gjatë udhëtimeve me makinë, avion apo anije.
Analistët vlerësojnë se shitjet e tradipitantit vetëm në SHBA mund të kalojnë 100 milionë dollarë në vit. FDA kishte vendosur më herët një pezullim të pjesshëm për ilaçin, por e hoqi atë në dhjetor, duke e klasifikuar sëmundjen e lëvizjes si gjendje akute.
