Në tregun farmaceutik në vend vijojnë abuzimet. Inspektorati Shtetëror Shëndetësor, në raportin vjetor të vitit të kaluar, nxjerr në pah disa problematika të rëndësishme që lidhen drejtpërdrejt me shëndetin e qytetarëve. Sipas raportit, gjatë inspektimeve sanitare në subjektet e tregtimit të barnave (farmaci dhe depo farmaceutike), janë konstatuar mangësi të tilla si mungesa e Akt-Miratimit higjieno-sanitar.
Po ashtu, në shumë raste nuk dihet çfarë ndodh me medikamentet e skaduara, pasi mungojnë kontratat me subjekte të licencuara për evadimin e tyre. Edhe më shqetësuese është prania e lagështirës në disa ambiente farmaceutike, duke rrezikuar cilësinë dhe sigurinë e barnave të ofruara për qytetarët.
Për këto shkelje, gjatë vitit 2024 Inspektorati ka vendosur:
1 masë administrative (gjobë në lekë)
1 vendim të ndërmjetëm për marrje mase urgjente
14 paralajmërime
Nga këto të fundit, 13 i përkasin qarkut të Fierit dhe 1 Tiranës. Gjoba është vendosur në një prej farmacive të qarkut të Fierit, ndërsa masa urgjente është marrë ndaj një subjekti farmaceutik në Durrës.
